أقول ايه ؟ أقول إيه ؟ آه ... ضهر الخيــــــر
ماهو بما إن الضهر بيأذن ، فاحنا لا بقينا الصبح و لا بقينا بالليل . بقينا الضهر. يبقى ضهر الخيـــــر :)
ده تاج من عند أحمد فايز
هو بعتلي التاج من زمان زمان قوي الصراحة و لحد نص ساعة فاتت كده مكنتش لسه عملته
بس أهو أنا عملته أهو بقى يا أحمد ومعلش على التأخير ، انت عارف بقى كنت مستنة أشتري فستان يليق على التاج ;)
احم احم احم .. أيوة .. كده الميكروفون مظبوط ؟
أتكلم يعني ؟ .. طيب شكلي حلو وانا عاملة نفسي شخصية مهممة كده ؟
طيب خلاص خلاص .. هابدأ أهو :)
ما هي كتب الطفولة التي بقيت عالقة في ذاكرتك؟
سلسلة قصص المكتبة الخضراء ، كنت باستعيرها من مكتبة المدرسة الابتدائي واقرأها في الحصص الفاضية ، و عقبال مابنتتهى السنة كان بيبقى عندي مخزون قصص وحكايات كتير قوي ، لما كنا بنسافر في الصيف عند ولاد عمي كنُا بنعمل دايرة كبيرة و اقعد احكي بقى كل اللي قرأته تقريبا رغم إن أنا كنت أصغر واحدة فيهم .. :)
مَنْ أهم الكتاب الذين قرأتَ لهم؟
ممممم .. مممممم .. طيب هو سؤال صعب قوي . أولاً لأن في ناس كتير كتير جداً لسه ماقرأتلهمش ، ثانياً لأني و بما ان ذاكرتي لاممكن تفوت حاجة ابدا ابدا - عدوها دي عدوها - فمكن قوي انسى ناس عايزة اقولهم ، بس عامة من ضمنهم أكيد محمد المخزنجي و بهاء طاهر و إبراهيم عبد المجيد و سحر الموجي و رضوى عاشور و محمد المنسي قنديل و .. و ... مش فاكرة حد تاني دلوقتي :(
من هم الكتاب الذين قررت ألا تقرأ لهم مجدداً؟
بالنسبالي صعب قوي آخد قرار زي ده ، مهما كان فكرة الكلام المكتوب ، لكن اللي ممكن يخليني أعمل كده بجد ولو كاتب فعلا فعلا اسلوبه وحش أو لغته سيئة جدا ، ساعتها أكيد هاخد قرار اني مش هاقرأله تاني لأنه ببساطة - في نظري - مبقاش كاتب و .. بس كده :)
في صحراء قاحلة ، أي الكتب تحمل معك؟
القرآن
خواطر الشيخ الشعراوي
من هو الكاتب الذي لم تقرأ له أبداً، وتتمنى قراءة كتبه؟
محمود درويش . من أحلامي العظيمة اني أقرأ الأعمال الكاملة بتاعة الراجل ده كلها كلها .. قولوا آمين
ما هي قائمة كتبك المفضلة ؟
حبة هوا لوليد طاهر
أوتار الماء للمخزنجي
ثلاثية غرناطة لرضوى عاشور
لا أحد ينام في الأسكندرية و طيور العنبر لإبراهيم عبد المجيد
ما هي الكتب التي تقرؤها الآن ؟
البستان : محمد المخزنجي
الرحيق المختوم : صفي الدين المبارك فوري
رسالة البصائر في المصائر : جمال الغيطاني
هيــــــــــــــــــــــــه .. خلاويص خلاص خلصنا خالص
كانت معكم الهانم حضرتي من أمام شاشة بوريو / الكمبيوتر المسمسم بتاعي
:)
7 التعليقات:
شوفتي الموضوع سهل ازاي
عقبال التاج الجاي
:)
عسل يا منمن انا كمان كنت بحب المكتبة الخضراء جدا
كل تاج وانتي عسوله :)
هههههههههه
انا التاج ده خلل عندي
:)
المفروض اني حاليا بدأت ف ثلاثية غرناطة مش قادرة استنى اخلص الكتاب ده بس للاسف الوقت وحش
سلامات يا بونبوناية
أحمد
تعيش وتسلم وتبعتلي تاجات :)
فراشة
كل وقت وانتي كويسة كده ومبسوطة
تعرفي .. اسم فراشة ده حلو قوي .. :)
رضوى
أحمد كده المفروض يدفعنا غرامة تأخير على التاج ده و انا اللي هالم الفلوس من المتأخرين وفي الآخر أخدها بقى ;)
بالنسبة لغرناطة .. فهي مدهشة حاولي تخلصيها :)
أنا مستغرب جدًا جدًا جدًا إن
طيور العنبر ولا أحد ينام جايين بعد أوتار الماء والثلاثية!!!
لأن دول عندي أصلاً مش في أي قائمة حلوة :)
مممممممممممممممممممم
وإن مفيشي حاجة كده لبهاء طـاهر :)
.
على كلٍ ربنا يوفقك يا بنتي
إنتي كويسة جدًا وهتكملي إن شااء الله
ربنا يسعدك
إرسال تعليق