يتم التشغيل بواسطة Blogger.
RSS

كويز



من أنت ؟
بسيطة قوي دي ، أنا منى يا سيدي
أكيد يعني زهرة قالتلك أومال هي باعتاك ازاي .. هاه ؟ حاجه غريبة والله !!


وما الذي تفعله هنا ؟
انت غريب قوي علي فكرة ، مش انت اللي جاي تسألني ، طيب أديني بجاوب أهو

إسرائيل تقصف كل جنوب ممكن بحثا عنك ، أي شمال تقصد؟
شمال اسرائيل طبعا ( زي عمرو بالظبط )

أنت مكلف بحذف حرف من حروف اللغة العربية .. أيها ستختار ولماذا؟
حرف الــ( د ) عشان بابا وخالو بقو بيحطوه قبل اسمي وانا بحبهم يقولو اسمي كده من غير حاجه قبليه
:( :( :(

لو قدر لك أن تدخل السجن فما هي القضية التي تتمنى أن تدخل بها إليه؟
تؤ تؤ تؤ انت ماتنفعش خالص خالص علي فكره
في حد يسأل البنات الأسئلة السخيفه دي ... طيب ابقي دور بقي عاللي هايرد عليك

نحن لا نعيش حياتنا بل نتعلم فيها كيف نعيش. ما تعليقك؟
ايه اللي انت بتقوله ده !! بص .. هنا في مصر يا تعيش يا تتعلم

على مفترق طريق لافتتان ، اليمنى تقول ( إلى حلمك) واليسرى تقول : (إلى ما لم يحلم به البشر) ، أي الطرق ستسلك؟
طيب وافرض الاتنين واحد أعمل انا ايه بقي ساعتها ؟! بص أنا هاشيل اليافطيتين واعمل يافطه جديدة أرسم عليها وش بيضحك واتجاها هيبقي علطول دايركت من غير يمين أو شمال وبعدين أنا أصلا لحد دلوقتي باتلخبط ما بين اليمين والشمال

بجملة واحدة فقط أكتب تعريفاً لكل كلمة من الكلمات التالية:
الوطن : قلب الولد اللي هاحبه
الأم : هالة نور
الليل : قهوة وسهراية وقلب دافي
الحب : زهرة بيضاء تلمع بالداخل
أمريكا : بلد برد وغريب
المرأة : طاقة فرح
الرجل : كلمة ( رجل ) كافيه جدا للتعريف
الصمت : أفكار كتير كتير
الأنترنت : لوح قزاز شفاف ورقييييييق ، بس بردو لوح قزاز ، سهل قوي يتكسر

أختر منصباً واتخذ قرارا؟
المنصب : ابقي (منى) مبسوطه
القرار : أخدني افسحني شويه والف بيا شوارع وسط البلد ، اشتريلي آيس كريم وكتاب وتوكه جديدة واخدها مشي بداية من الكليه مرورا بكوبري الجامعه وشارع النيل والأوبرا وفي الآخر أروح أقعد في حديقة الجزيره أشرب واحد نيسكافيه بعديها أنام وابص للسما الواسعاااااا

قيس، عنترة، جميل…. الذين يقولون شعرا….. وليلى وعبلة وعزة ”صموت”لماذا هذا التغييب للمرأة؟
لأ طبعا ياذكي ... لو ليلي وعبلة وعزه مش موجودين ماكنش الأخوه قيس وعنترة وجميل عرفو يقولو حاجه بتاتا .. وراء كل عظيم امرأة يابني ، انت ماتعرفس كده ولا ايه !!!

إلى أين تمضي كلمات الحب بعد أن نقولها?
تتحول إلي طاقات نور وضي خفيف بيلمع جوا العيون

هل تجد علاقة بشكل أو بآخر بين المرأة وقطاع الطرق؟
لأ .. وبعدين أنا عمري ماشوفت قطاع طرق واحده ست علطول علطول رجاله
حاجه غريبة والله!!

هذا فراق بيني وبينك .. متى ولمن تقولها ؟
لأي حد خلاني أفقد الثقه فيه

كيف هو غداً ؟
اليوم بحر نعديه للي احنا بنحلم بيه

تمرر التاج لمين؟
ممممممم ..... ليك مبدئيا وانت داير تسأل الناس كلها كده ومحدش يعرف عنك حاجه وبعدين لجارة القمر ولأنجي وقولهم منى قلقانه عليكو ، انتو فين بقالكم فتره !! بعد كده بقي تروح لـ أحمد الشمسي والشاب الفقري ومصطفي السيد سمير واوعي تمشي إلا لما يحلو الكويز العجيب بتاعك ده ، وفي الأخر خالص خالص تلف وترجع لزهره تاني وتفضل قاعد عندها ماتتحركش .. أنا باقولك أهو، لحد ماتحطلنا الكويز بتاعها في بوست عدل نعرف نقرا منه بدل فرح الحروف اللي عندها دا
:))

  • Digg
  • Del.icio.us
  • StumbleUpon
  • Reddit
  • RSS

9 التعليقات:

جارة القمر يقول...

ازيك يا جميلة عاملة ايه ؟؟
وحشتينى بجد بس معلش مش ليا نفس اكتب حاجه .. المهم طمنينى عليكى بقى

هقرا و اجى تانى

جارة القمر يقول...

تصدقى انا بحبك اوووى معرفش ليه حسيت انى عايزة اقولك كدا اجاباتك زى روحك خفيفة و جميلة
بس اييييه دا بقى احنا فينا من كدا ها ها ؟؟ ردى عيب كدا ولا مش عيب ال بتمررى الكويز لجارة القمر
طب انا هغير اسمى بقى :P:P

Isolde يقول...

اجاباتك متفائلة زيك يا مني... و علي فكرة عجبني تعريفك للرجل... انا فاكرة ايام الجامعة كان ليا واحدة صاحبتي اسمها هالة، في يوم محاضرة لاتيني اتلغت و قعدنا فاضيين ييجي ساعتين كدة، قالت انا هاعمل نفسي هالة سرحان و اسألكوا سؤال رخم تجاوبوا عليه بالدور... السؤال هو" ايه مواصفات شريك حياتك؟" طبعا كله كان بيلعب في منطقة الحصان الابيض و الوظيفة المحترمة( باعتبار انها تعني انه شخص محترم بالتبعية) و اختك لما جه عليها الدور قالت " نفسي يكون راجل" ضحكوا عليا طبعا وقالو لي ما اهو اكيد راجل( بمعني ذكر يعني و لا مؤاخذة) بس تعملي ايه لو المفهوم ده اضرب عندك... انا و بلا فخر باحترم رجالة كتيييييير جدا... لكن في الحب و الجواز، لسة ما شفتش راجل!!!
ايه ده، دي شكلعا هتقلب بجد، انا هاروح اشوف حاجة اتبهجج بيها، سلام يا بسبوسة
:)

Heba Gamal Emara يقول...

اهلا بنبونة
بجد ضحكت والله من اجاباتك اللذيذه دى بس متهيالى فى اسئله ناقصة
بس ولا يهمك برضه يا رب دايما منى الفرحانه والجميلة واللذيذه

شاب فقرى يقول...

ياااااااااااه

جميل

وانا موافق

شاب فقرى

عمرو يقول...

بنبونة
جميل قوي
:)

enjy يقول...

انا جييييييييييييييييييييييييييييييييييت

انجى بترمى احلى سلام لمنى هانم من غير حرف الدال وكل الناس الحلوين اللى وحشوها وبتقولهم انا بجد كنت محتاجاكم الفترة اللى فاتت انتوا ليه مش سالتوا عليا؟؟؟؟

عموما مش مهم....عجبنى التاج هبقى اجاوبه وبرضو هجاوب اجابات خفيفة كدة..ضحكت على فكرة انتى وعمرو وايزولد جاوبتوا اجابات تحفة

اكرمك الله

شفـقــة و إحســــان يقول...

مبروك التاج وعقبالنا
بس اجابتك خفيفة وردك لذيذ
كل سنة وانتى طيبة

ponpona يقول...

أهلا بكم جميعا

لا أريد ... بل لا أستطيع الحديث اليوم
وكنت أتمني أن أكون في حالة مزاجية أفضل

:(

إرسال تعليق